ချင်းပြည်နယ် တောင်ပိုင်း ပလက်ဝမြို့တွင် နိုင်ငံခြားမှ ပြန်လာပြီး Quarantine ဝင်နေသူ ၄၅ ဦးအနက် ၁၆ ဦးသာ ကျန်ရှိ တော့ကြောင်း သိရသည်။

၂၉ ဦးကို ၁၄ ရက်အတွင်း COVID-19 ရောဂါ လက္ခဏာ မတွေ့ရှိသည့် အတွက် ပြန်လွှတ်လိုက် ခြင်း ဖြစ်ကြောင်း ပလက်ဝ မြို့နယ် ပြည်သူ့ဆေးရုံအုပ် ဒေါက်တာ စိုးသက်ဝင်းက ဧရာဝတီသို့ ပြောသည်။

ကျန် ၁၆ ဦးသည် တရုတ်နိုင်ငံမှ ပြန်ရောက်လာကြသူများ ဖြစ်ပြီး Quarantine ဝင်နေသည်မှာ ၉ ရက်ရှိပြီဟု လည်း သိရသည်။

ဒေါက်တာ စိုးသက်ဝင်းက“လက်ရှိမှာ စောင့်ကြည့်လူနာတော့ မဟုတ်ဘူး။ Quarantine ဝင်နေ တာ ၁၆ ဦး ကျန်သေးတယ်။ အရင်က ၄၅ ဦးရှိတာ၂၉ ဦးပြန်သွားတယ်။

အရင်စောင့်ကြည့်လူနာ ၂၂ ဦးလည်း ဘာရောဂါမှ မတွေ့လို့ ပြန်သွားကြပါပြီ’’ဟု ပြောသည်။

ပြန်သွားကြသည့် စောင့်ကြည့်လူနာ ၂၂ ဦးက တရုတ်မှ ၁၈ ဦး၊ စင်္ကာပူမှ ၃ ဦးနှင့် ကာတာမှ ၁ ဦး တို့ဖြစ်ပြီး ၎င်းတို့သည် ကိုယ်ပူချိန်ရှိနေသဖြင့် ပလက်ဝမြို့နယ်ဆေးရုံတွင် စောင့်ကြည့် လူနာ အဖြစ် ထားရှိခြင်းဖြစ်သည် ဟု ဆိုသည်။

ပလက်ဝမြို့နယ်သည် တပ်မတော်နှင့် ရက္ခိုင့်စစ်တပ်(AA) တို့ တိုက်ပွဲဖြစ်ပွားနေသည့် ဒေသ ဖြစ်သလို လက်ရှိ တွင် အင်တာနက်လိုင်းများ ဖြတ်တောက်ခံထားပြီး ညမထွက်ရ အမိန့်လည်း ထုတ်ပြန်ထားသည့် ဒေသလည်း ဖြစ်သည်။

လျှပ်စစ်မီး ရရှိမှုအခြေအနေမှာလည်း အစိုးရကပေးသည့် မီးစက်ဖြင့် တနေ့ကို ၃ နာရီသာ မီးရရှိကြောင်း သိရ သည်။

ပလက်ဝမြို့ COVID-19 ကာကွယ် စောင့်ရှောက်ရေး အဖွဲ့မှ အဖွဲ့ဝင် ဦးကျော်ဇောက“တလောက ကျနော်တို့ ဒေသခံတဦး က ပလက်ဝမြို့မှာ COVID-19 ရောဂါသည် ရှိတယ်ဆိုပြီး မသိဘဲနဲ့တင် လိုက်တာ။ ကျနော်တို့ ပလက်ဝမှာ ရောဂါသည် မရှိပါဘူး။ လာရောက်စစ်ဆေးလို့ ရပါတယ်။ အင်တာနက်က ပိတ်ထားတော့ ရောဂါနဲ့ ပတ်သက်ပြီး မသိရတော့ ပြန်ဖွင့်စေ ချင်တယ်’’ဟု ပြောသည်။

ပလက်ဝမြို့နယ်တွင် ကျေးရွာ ၄၀၀ ကျော်ရှိပြီး လူဦးရေ ၁ သိန်းကျော် နေထိုင်ကြကာ လူဦးရေ ၆ သောင်းခန့် စစ်ဘေးဒဏ် သင့်နေရသည်ဟု ချင်းပြည်နယ် အစိုးရအဖွဲ့ထံမှ သိရသည်။

တိုက်ပွဲများကြောင့် ရေလမ်း၊ ကုန်လမ်း အစရှိသည့် ဆက်သွယ်ရေးလမ်းကြောင်းများ ပိတ်ထား သည့်အတွက် ပလက်ဝမြို့ နယ်တွင် အခြေခံစားသောက်ကုန်များ ပြတ်လပ်နေသည့်အပြင် ဆေးဝါး လိုအပ်ချက်လည်း ရှိကြောင်း ပလက်ဝမြို့နယ် ဆေးရုံမှ သိရသည်။

ဒေါက်တာ စိုးသက်ဝင်းက“ကျနော်တို့မှာ အခြေခံဆေးဝါးကတော့ လုံလောက်ပါတယ်။ အထူး ဆေးဝါးတွေပဲ လိုအပ်နေတာ။ အထူးဆေးဝါးဆိုတာ ခွဲစိတ်လူနာအတွက် ပေးရတဲ့ဆေးဝါးမျိုး နောက် အသည်းရောဂါလိုမျိုး အတွက် ပေးရမယ့် ဆေးဝါး စတာတွေပေါ့။ အဲဒါတွေက မရှိတော့ တဲ့အတွက် တကယ်ရောဂါဖြစ်လာတဲ့သူ ရှိ လာရင် ကျနော်တို့ ကုသဖို့ခက်လိမ့်မယ်’’ ဟု ပြောသည်။

ပလက်ဝမြို့နယ်တွင် COVID-19 ကာကွယ်ရေးအတွက် ဈေးသည်များကို ၃ ပေအကွာမှ ရောင်း ချရန် ဆော်သြ ခြင်း၊ သား၊ ငါး ဈေးများတွင် ပိုးသတ်ဆေးဖျန်းခြင်း၊ လက်ကမ်းစာစောင်များ ဖြန့်ဝေခြင်းနှင့် လက်ဆေးနည်းများကို မြို့ပေါ်ရပ်ကွက်များ တွင် လိုက်လံလုပ်ဆောင်ပေး လျက် ရှိသည်ဟု ချင်းပြည်နယ် COVID-19 ကာကွယ် စောင့်ရှောက်ရေး အဖွဲ့ထံမှ သိရသည်။

ချင်းပြည်နယ် အစိုးရအဖွဲ့ဝင် စည်ပင်ဝန်ကြီး ဦးစိုးထက်က အင်တာနက်လိုင်းများ ပိတ်ထားခြင်း ကြောင့် ပလက်ဝ မြို့နယ် တွင် COVID-19 နှင့်ပတ်သက်ပြီး ချင်းပြည်နယ် အစိုးရက ဖုန်း၊ ကြေး နန်း၊ တရားဝင် စာများဖြင့် ရောဂါကာကွယ်ရေး အသိပညာပေးမှုများ လုပ်ဆောင်နေကြောင်းနှင့် သွားလာရေးခက်ခဲသည့် အတွက် လိုအပ်သော အထူးဆေးဝါးများကို ပို့ပေးရန် အစီအစဉ် မရှိသေးကြောင်း ပြောသည်။

ချင်းပြည်နယ်ရှိ မြို့နယ် ၉ ခုတွင် ပြည်ပမှ ဝင်ရောက်လာသူ စုစုပေါင်း ၅၂၉ ဦးရှိပြီး ၎င်းတို့အနက် ၁၄ ရက် စောင့်ကြည့် ကာလ ပြည့်သဖြင့် ပြန်သွားသူ ၁၅၄ ဦးရှိကာ လက်ရှိ Quarantine ဝင်နေသူ ၃၇၅ ဦးသာ ရှိတော့ကြောင်း ချင်းပြည်နယ် အစိုးရအဖွဲ့ထံမှ သိရသည်။

Credit