တရုတ်မှာရှိနေဆဲ မြန်မာနိုင်ငံသားတွေ ဧပြီ ၁၃ ရက်နောက်ပိုင်းမှ ပြန်ခွင့်ရဖွယ်ရှိ

မြန်မာနိုင်ငံကို ပြန်ချင်ဖို့ မြန်မာသံရုံးကို စာရင်းပေးထားတဲ့ တရုတ်နိုင်ငံတွင်း မြန်မာနိုင်ငံသား ၁၀၀ နီးပါးရှိပြီး သူတို့ကိုတော့ တရုတ်နိုင်ငံ ဝင်ထွက်ခွင့်ပြန်ဖွင့်မှ သံရုံးအစီအစဉ်နဲ့ ပြန်ပို့မယ်ဆိုတဲ့အကြောင်း ပြောပြပါမယိ။ တရုတ်နိုင်ငံက နိုင်ငံတွင်း အဝင်အထွက်ပိတ်လိုက်တာကြောင့် တရုတ်နိုင်ငံကို တရားမဝင် ရောက်ရှိနေတဲ့ မြန်မာလုပ်သားတွေကို ပေကျင်းမြို့က မြန်မာသံရုံးရဲ့အစီအစဉ်နဲ့ ပြန်လည်ပို့ဆောင်ပေးနေတဲ့ ကိစ္စကို မတ်လ ၃၁ ရက်နေ့မှာ ရပ်နားထားရတာပါ။  အဝင်အထွက် မပိတ်ခင်က ပေကျင်းမြန်မာသံရုံးရဲ့ အစီအစဉ်နဲ့ ပြန်ပို့ပေးခဲ့တဲ့ တရားမဝင် မြန်မာလုပ်သား အရေအတွက်က ၉၀၀ ကျော်ရှိခဲ့ပါတယ်။ နေရပ်ပြန်နိုင်ဖို့ စာရင်းပေးသွင်းထားသူ စုစုပေါင်းက ၁,၅၀၀ ကျော် ရှိခဲ့ပေမယ့် နေရပ်လိပ်စာနဲ့ ဖြည့်စွက်ရမယ့် အချက်အလက်ကို အပြည့်အစုံပို့ပေးပြီး ဆက်သွယ်လာတဲ့ ၉၀၀ ကျော်ကိုပဲ ပြန်ပို့ပေးခဲ့တာပါ။ ဝူဟန်မြို့ ပိတ်ထားစဉ်က ပိတ်မိနေခဲ့တဲ့ မြန်မာတွေကိုလည်း ပြန်ပို့ပေးနိုင်ဖို့ မြန်မာသံရုံးက သက်ဆိုင်ရာ ရဲဌာနတွေနဲ့ ဆက်သွယ် ညှိနှိုင်းထားပါတယ်။ လက်ရှိမှာ လေကြောင်းလိုင်းတွေ ရပ်နားထားတဲ့အတွက် ပေကျင်းမှာရှိနေတဲ့သူတွေ ပြန်ပို့ဖို့ကိုလည်း ဧပြီလကုန်ပြီးလောက်မှသာ ဖြစ်နိုင်မယ်လို့ ပေကျင်းမြန်မာသံရုံးရဲ့ တာဝန်ရှိသူက ပြောပါတယ်။ “လက်ရှိမှာ ကျနော်တို့ ဝူဟန်မှာပေါ့နှော်။ ဝူဟန်မှာတော့ မြန်မာတွေ ရှိနေတယ်ခင်ဗျ။ အဲ့ဒီ ဝူဟန်က ရဲတွေနဲ့တော့ ကျနော်တို့ အဆက်အသွယ်ရှိပါတယ်။ ဝူဟန်ပိတ်ထားတုန်းက ပြန်မပို့နိုင်လိုက်တဲ့ သူတွေက အဲ့မှာ အကြမ်းဖျဉ်း ၄၊ ၅၊ ၆၀ ကျော်ကျော်လောက်ရှိပါတယ်။ အဲ့ဒါတော့ကျန်ပါသေးတယ်ဗျ။ အဲ့တာကို ရဲတွေနဲ့ ဆက်သွယ်ပြီး ပြန်ပို့ဖို့ ရှိပါတယ်။ ပေကျင်းမှာလည်း ရှိပါသေးတယ်။ လေကြောင်းလိုင်းတွေကလည်း ပိတ်ထားတာဆိုတော့ ပေကျင်းမှာလည်း အကြမ်းဖျဉ်းက ၃၉ ယောက်လောက် ရှိပါသေးတယ်။ လေယာဉ်ကတော့လေ လက်ရှိက ဧပြီလ ၁၃ ရက်နေ့ထိလားမသိဘူးနော် ... အကုန်လုံး ရပ်ထားတယ်ဆိုတော့လေ ဒါတောင်မှ အဲ့ဒီနောက်ပိုင်း ဆိုပေမဲ့ ၁၃ ရက်နေ့ထိ တင်းကြပ်ထားတယ်ပေါ့။ အဲ့ဒီနောက်ပိုင်း အခြေအနေပေါ်မူတည်ပြီး ပြန်ဖွင့်တာပေါ်မူတည်ပြီး ကျနော်တို့ ပို့ဖို့အတွက် ဆောင်ရွက်ထားပါတယ်ခင်ဗျ။ ” ပြန်ပို့စာရင်းပေးသူ ၁,၅၀၀ ထဲက စီစစ်ပြီး ၉၀၀ ကျော် ပြန်ပို့ခဲ့ပေမဲ့ ကျန်သူအချို့ကတော့ ကိုယ့်အစီအစဉ်နဲ့ကိုယ် ပြန်သွားသူအချိုု့လည်း ရှိခဲ့တယ်လို့ ပေကျင်း မြန်မာသံရုံးက တာဝန်ရှိသူက ပြောပြပါတယ်။ “တချို့မှာလည်း ၁,၅၀၀ မှာက ပြန်မဆက်သွယ်တာတွေလည်း ရှိတယ်။ တချို့ကလည်း မိမိအစီအစဉ်နဲ့ မိမိပေါ့နော်။ ခုနောက်ပိုင်း ပြန်လို့ရတော့ အဲ့ဒီလို ပြန်ရောက်သွားတာတွေလည်း ရှိပါတယ်။ တချို့ကျတော့လည်း ဖြစ်ခါစမှာ ဆက်သွယ်တယ်။ နောက်ပိုင်း ကျွန်တော်တို့က အချက်အလက်တွေ တောင်းတာပေါ့နှော်၊ တောင်းတဲ့အခါ သူတို့ဘက်က ပြန်ပြီးတော့ မဆက်သွယ်လာတာတွေလည်း ရှိတယ်။ တချို့ကျတော့လည်း မြန်မာနိုင်ငံကို မိမိအစီအစဉ်နဲ့မိမိ ပြန်သွားတာတွရှိတယ်၊ တချို့ကလည်း စက်ရုံကနေပြီးတော့ တချို့ သဘောကောင်းတဲ့ အလုပ်ရှင်တွေက ပြန်ပို့လို့ ရောက်သွားတာတွေ ရှိတယ်။ တချို့ကျတော့လည်း ပြန်ဖို့စောင့်နေရင်းနဲ့ စက်ရုံက ပြန်လည် လည်ပတ်နေတာဖြစ်တဲ့အတွက် မပြန်တာမျိုးရှိပါတယ် ခင်ဗျ။” တရုတ်နိုင်ငံကို တရားမဝင်ရောက်ရှိနေကြတဲ့ မြန်မာအလုပ်သမားအရေအတွက်က သောင်းဂဏန်းကျော်ရှိနိုင်တယ်လို့ ပေကျင်း မြန်မာသံရုံးက ခန့်မှန်းပါတယ်။ သံရုံးအစီအစဉ်နဲ့ ပြန်လာကြသူတွေကို တရုတ်ပြည်တွင်း ဖြတ်သန်းလာတဲ့ လမ်းတစ်လျှောက် ပြည်နယ်တွေရဲ့ ဂိတ်တွေမှာ ကျန်းမာရေးစစ်ဆေးတာတွေ လုပ်သလို မြန်မာနိုင်ငံ နယ်စပ်ဂိတ် ဝင်ပေါက်တွေမှာလည်း ကျန်းမာရေးစစ်ဆေးတာတွေ လုပ်ဆောင်ပေးပါတယ်။ တရုတ်နိုင်ငံ ဝူဟန်မြို့ကနေ စတင်ဖြစ်ပွားခဲ့တဲ့ ကိုရိုနာဗိုင်းရပ်စ်ပိုး COVID-19 ရောဂါကို တရုတ်နိုင်ငံမှာ ကူးစက်မှု ထိန်းချုပ်လိုက်နိုင်ပြီးဖြစ်ပေမဲ့ လက်ရှိမှာတော့ WHO ကိန်းဂဏန်းအရ ကမ္ဘာ့နိုင်ငံနဲ့နယ်မြေ စုစုပေါင်း ၂၀၆ နေရာကို ကူးစက်ပြန့်ပွားလျက်ရှိပါတယ်။

#credit