ရှမ်းမြောက်ပိုင်းမှာ တိုက်ပွဲ ပြန်ဖြစ်

အပစ်ရပ်ကြောင်း တပ်မတော်နှင့် မြောက်ပိုင်းမဟာမိတ် တိုင်းရင်းသားလက်နက်ကိုင်အဖွဲ့များက အသီးသီးကြေညာထားသော်လည်း ဇွန်လအတွင်း တိုက်ပွဲများ ပြန်ဖြစ်ပွားနေသည်။

တပ်မတော်ကာကွယ်ရေးဦးစီးချုပ်ရုံးကမေ ၁၀ ရက်မှ စ၍ ၃ လတာ အပစ်ရပ်ဆိုင်းကြောင်း ကြေငြာထားသော်လည်း ရှမ်းပြည်နယ်မြောက်ပိုင်း၊ မူဆယ်မြို့နယ်၊ ကွတ်ခိုင်မြို့နယ်၊ နမ့်ခမ်းမြို့နယ်နှင့် မန်တုံမြို့နယ် တို့၌ KIA၊ TNLA တို့နှင့် ဇွန်လအတွင်း တိုက်ပွဲများ ပြန်လည် ဖြစ်ပွားခြင်း၊ စစ်ရေးတင်းမာမှုများဖြစ်ပွားနေသည်။
တိုက်ပွဲများမှာ တပ်မတော်ဘက်မှ ၎င်းတို့ တပ်စခန်းများရှိရာ နေရာသို့ လာရောက် ထိုးစစ်ဆင်တိုက်ခိုက်သဖြင့် ပစ်ခတ်ကြရခြင်း ဖြစ်သည်ဟု KIA နှင့် TNLA တို့က ပြောနေကြသည်။
အပစ်ရပ်ဆိုင်းထားသည့်ကာလတွင် KIA၊ TNLA တို့နှင့် တိုက်ပွဲများပြန်လည် ဖြစ်ပွားနေသည့် အပေါ် သဘောထား တောင်းခံရန်ဆက်သွယ်သောအခါ တပ်မတော်သတင်းမှန်ပြန်ကြားရေးအဖွဲ့မှ ဗိုလ်မှူးချုပ်ဇော်မင်းထွန်းက ဇွန် ၇ ရက်တွင် ကွတ်ခိုင်မြို့၏ အရှေ့မြောက်ဘက် မီတာ ၁၂၀၀၀ ခန့်တွင် တပ်မတော်နှင့် KIA တိုက်ပွဲဖြစ်သည်မှာ မှန်ကန် ကြောင်း အတည်ပြုပြီး တိုက်ပွဲဖြစ်ရခြင်းမှာ KIA က နယ်မြေကျော်လွန် လှုပ်ရှားခြင်း ကြောင့်ဟု ပြောသည်။
ဇွန် ၇ ရက် မနက်ပိုင်းတွင် KIA တပ်ဖွဲ့ အင်အား ၁၅ ဦးခန့်နှင့် ပစ်ခတ်မှုဖြစ်ပြီး နေ့လည် ၁၂ နာရီ ခန့်တွင် KIA တပ်ဖွဲ့အင်အား ၅၀၊ ၆၀ ခန့်ဖြင့် တိုက်ပွဲဖြစ်ကြောင်း၊ KIA ဆီမှ လက်နက်အချို့ ရရှိခဲ့ပြီး တပ်မတော်ဘက်မှ ထိခိုက်ဒဏ်ရာ ရရှိသူအချို့ရှိခဲ့ပါသည်ဟု ဗိုလ်မှူးချုပ်ဇော်မင်းထွန်းက ပြောသည်။
KIA ကမူ အစိုးရ၏ အမျိုးသားပြန်လည်သင့်မြတ်ရေးနှင့် ငြိမ်းချမ်းရေး ဗဟိုဌာန (NRPC) ၊ ငြိမ်းချမ်းရေးကော်မရှင်(PC) တို့နှင့် ပဏာမ အပစ်ရပ်စာချုပ် (Bilateral) ညှိနှိုင်းနေဆဲကာလတွင် အောက်ခြေတပ်များအားမြေပြင်သို့ ထွက်ကာ လှုပ်ရှားသွားလာခြင်း၊ လမ်းမပေါ် ထွက်ခြင်း၊ မြို့ပေါ်နှင့် တပ်မတော်တပ်စခန်းချထားသည့် နေရာများသို့ သွားရောက် ထိုးစစ်ဆင် တိုက်ခိုက်ခြင်းများ မပြုလုပ်ရန် ညွှန်ကြားထားသည်ဟု ဗိုလ်မှူးကြီးနော်ဘူက ပြောသည်။
ရှမ်းပြည်နယ်မြောက်ပိုင်း၊ ကွတ်ခိုင်မြို့နယ်နှင့် မန်တုံမြို့နယ်တို့တွင်လည်း တပ်မတော်နှင့် တိုက်ပွဲများ ဖြစ်ပွားပြီး စစ်ရေး တင်းမာနေသည်ဟု TNLA ဘက်က ပြောဆိုသော်လည်း တပ်မတော် ပြောခွင့်ရသူ ဗိုလ်မှူးချုပ်ဇော်မင်းထွန်းက TNLA နှင့် တိုက်ပွဲဖြစ်ပွားခြင်း မရှိသေးဟု ငြင်းဆိုသည်။
TNLA၊ မြန်မာအမျိုးသားဒီမိုကရက်တစ်တပ်မတော် (MNDAA) နှင့် ရက္ခိုင်စစ်တပ် (AA ) တို့ ညီနောင်မဟာမိတ် ၃ ဖွဲ့ သည် ဇွန် ၁ ရက်မှ သြဂုတ် ၃၁ ရက်ထိ စစ်ရေးလှုပ်ရှားမှုများကို ရပ်တန့်ပြီး တပ်မတော်နှင့် အပစ်ရပ်ဆိုင်း မည်ဖြစ်ကြောင်း ကြေငြာချက်ထုတ်ထားသည်။
တပ်မတော်သည်လည်း COVID-19 ရောဂါ ကာကွယ်၊ ကုသရေးနှင့် ထိန်းချုပ်ရေးတို့ကို ကျယ်ပြန့်စွာ ဆောင်ရွက်နိုင်ရန်အတွက်ဟူသည့် အကြောင်းပြချက်ဖြင့် မေ ၁၀ ရက်မှ သြဂုတ် ၃၁ ရက်အထိ တနိုင်ငံလုံးတွင် အပစ်ရပ်ဆိုင်းပေးပါမည်ဟု တပ်မတော် ကာကွယ်ရေး ဦးစီးချုပ်ရုံးမှ ထုတ်ပြန်ကြေငြာထားသည်။
TNLA ၏ သတင်းနှင့် ပြန်ကြားရေး တာဝန်ခံ ဗိုလ်မှူးမိုင်းအိုက်ကျော်က “အဓိက ကတော့ ထိုးစစ်တက်လာတော့ ကျနော် တို့လည်း မလွဲမရှောင်သာ ပြန်လည် ခုခံရတာပါ။ ခုခံရင်း တိုက်ပွဲ ဖြစ်တာပါ။ ထိုးစစ်က တော်တော်လေး ပြင်းထန်တယ်။ တောက်လျှောက် ဇွန်လထဲမှာ တိုက်ပွဲ ဖြစ်တာ အကုန်လုံးကကျနော်တို့ ရှိတဲ့ နေရာကို လာရောက် ထိုးစစ်ဆင် တိုက်ခိုက် လို့ တိုက်ပွဲဖြစ်တာပါ”ဟုပြောသည်။
သို့ရာတွင် မေလ ၂၉ ရက်နေ့ ကွတ်ခိုင်မြို့နယ်၊ ပြည်ထောင်စုလမ်းမကြီးအနီးရှိ နမ့်ကွတ်ရွာအနီးဝန်းကျင်တွင် မူဆယ်မှ ဆင်းလာသည့် တပ်မတော်ယာဉ်တန်းကို TNLA က မိုင်းခွဲတိုက်ခိုက်ခဲ့သည်။
တပ်မတော်က အပစ်ရပ်ဆိုင်းပေးပါသည်ဟု ဆိုထားသော်လည်း ခြွင်းချက်မရှိ ရပ်ဆိုင်းပေးခြင်း မဟုတ်ဘဲတပ်မတော် ကာကွယ်ရေးဦးစီးချုပ်၏ ငြိမ်းချမ်းရေး မူ ၆ ချက်ထဲတွင် ပါဝင်သည့် သဘောတူ စာချုပ်များအတိုင်း ကတိတည်ရန်၊ ငြိမ်းချမ်းရေးသဘောတူညီချက်များအပေါ် အမြတ်မထုတ်ရန်၊ ဒေသခံများကို ဝန်ထုပ်ဝန်ပိုးမဖြစ်စေရန်နှင့် တည်ဆဲ ဥပဒေများကို လိုက်နာရန် ဟူသည့် အချက်များကို မလိုက်နာပါက လိုအပ်သလို အရေးယူပါမည်ဟု ထည့်သွင်းရေးသားထားသည်။
KIA ၊TNLA၊MNDAA ၊ AA တို့သည် အစိုးရ၊ တပ်မတော်တို့နှင့် ပဏာမ အပစ်ရပ်စာချုပ် (Bilateral)ရေးထိုးနိုင်ရန် ညှိနှိုင်းနေဆဲ ဖြစ်ပြီး လက်ရှိတွင် စာချုပ်အတွက် သဘောတူညီချက် တစုံတရာရရှိခြင်း၊ ညှိနှိုင်းမှု ပြေလည်ခြင်း မရှိသေးပါ။ COVID-19ရောဂါရင်ဆိုင်နေရသည့် မတ်မှ ယခု ဇွန်အထိ Bilateral ကိစ္စ ညှိနှိုင်းရန်၊ တွေ့ဆုံရန်ဆွေးနွေးမှုများလည်း ရပ်ဆိုင်းနေပြီး ထပ်မံတွေ့ဆုံကြရန်လည်း ညှိနှိုင်းနိုင်ခြင်း မရှိသေးပါ။
Credit Irrawaddy