ရခိုင်မှာ WHO မော်တော်ယာဉ် တိုက်ခိုက်ခံရမှုအပေါ် ကန် ပြစ်တင် ရှုတ်ချ

 မြန်မာနိုင်ငံ၊ ရခိုင်ပြည်နယ်အတွင်း ဧပြီလ ၂၀ ရက်နေ့က ကုလသမဂ္ဂ အမှတ်တံဆိပ် ထင်ထင်ရှားရှား ပါရှိတဲ့ မော်တော်ယာဉ် တစ်စီး ပစ်ခတ် တိုက်ခိုက်ခံရတဲ့အတွက် ပြစ်တင် ရှုတ်ချကြောင်း ဧပြီလ ၂၂ ရက်နေ့ ရက်စွဲနဲ့ အမေရိကန် နိုင်ငံခြားရေးဝန်ကြီး က ကြေညာချက် တစ် စောင် ထုတ်ပြန်ခဲ့ပါတယ်။ ကမ္ဘာ့ကျန်းမာရေး အဖွဲ့ (WHO) ရဲ့ ဝန်ထမ်းတစ်ဦး သေဆုံး ခဲ့သလို ကျန်းမာရေး ဝန်ကြီးဌာန က ဝန်ထမ်းတစ်ဦး ဒဏ်ရာ ရရှိ ခဲ့တဲ့ အဲဒီ တိုက်ခိုက်မှု ဖြစ်ပွားချိန်မှာ တိုက်ခိုက်ခံရသူတွေဟာ COVID-19 ရောဂါတိုက်ဖျက်ရေးမှာ ပါဝင် လုပ်ဆောင်နေတယ်လို့ သိရှိနားလည်းထားကြောင်း၊ ဒီ ဆိုးရွားတဲ့ လုပ်ရပ်က အကာအကွယ်မဲ့ အရပ်သားတွေကို အကာအကွယ် ပေးဖို့ လိုအပ်နေတာနဲ့ ရခိုင် ပြည်နယ်အတွင်း အပစ်အခတ် ရပ်စဲဖို့ အပူတပြင်း လိုအပ်နေတာတွေ ကို ထင်ထင်ရှားရှား ပြသလိုက်တာ လို့လည်း အမေရိကန် နိုင်ငံခြားရေး ဝန်ကြီးဌာန ပြောခွင့်ရ MORGAN ORTAGUS က ပြောပါတယ်။ ဒီလုပ်ရပ်ဟာ ဗိုင်းရပ်စ် ပျံ့နှံ့နေ တာကို တားဆီးဖို့ တစ်ကမ္ဘာလုံး က ကြိုးပမ်းအားထုတ်နေတာကို အနှောက်အယှက် ပြုလိုက်တာပဲလို့လည်း ဖော်ပြထားပါတယ်။ ကြေညာချက်ထဲမှာ ဒီ ဖြစ်ရပ်ကို စုံစမ်း စစ်ဆေးပေးဖို့နဲ့ ကျူးလွန်သူတွေကို အပြစ်ပေး အရေးယူဖို့ မြန်မာ အာဏာပိုင်တွေကို တိုက်တွန်းထားပြီး ကျန်းမာရေးနဲ့ လူသားချင်း စာနာမှုဆိုင်ရာ ဝန်ထမ်းတွေ အလုပ်လုပ် နိုင်ရေးအတွက် ခြိမ်းခြောက်မှု အန္တရာယ် လွတ်ကင်းတဲ့ အခြေအနေ အခုလို အချိန်မှာ ပိုပြီး လိုအပ်နေပါတယ်လို့လည်း တောင်းဆိုထားတယ်။ တိုက်ခိုက်မှု ဖြစ်ပွားပြီး နောက်တစ်ရက် ဧပြီလ ၂၁ ရက်နေ့ မှာ မြန်မာ နိုင်ငံခြားရေးဝန်ကြီးဌာနက ဒီ ဖြစ်ရပ်အပေါ် စုံစမ်းမှုတွေလုပ်ဖို့နဲ့ နောင်မဖြစ်အောင် ကာကွယ်တားဆီးမယ်လို့ ကြေညာချက် ထုတ်ပြန်ခဲ့ပါတယ်။ ဒါပေမဲ့ ဧပြီလ ၂၂ ရက်နေ့မှာပဲ WHO ကား တိုက်ခိုက်ခံရတဲ့နေရာနဲ့ မဝေးတဲ့နေရာမှာပဲ CPS ပိုးသတ်ဆေး ကုမ္ပဏီက ဆေးပစ္စည်းတွေ တင်ဆောင်လာတဲ့ ကားတစ်စီးပစ်ခတ်ခံရတာကြောင့် ယာဉ်မောင်းသေဆုံးပြီး တစ်ဦး ဒဏ်ရာရခဲ့ပါတယ်။ ပစ်ခတ်မှုကို ရခိုင် လက်နက် ကိုင်တပ် AA က လုပ်တာလို့ မြန်မာ စစ်တပ်က စွပ်စွဲ ထားပြီး AA က ငြင်းဆိုထားပါတယ် ရခိုင်ပြည်နယ်အတွင်းမှာ ဒီကနေ့အထိ တိုက်ပွဲတွေ ဆက်လက်ပြင်းထန်နေသလို တိုက်ပွဲအတွင်း အရပ်သားတွေ ထိခိုက် သေဆုံး တိုင်း မှာလည်း တပ်နဲ့ AAနှစ်ဖက်စလုံးဟာ တစ်ဘက်နဲ့ တစ်ဘက် အပြန်အလှန် စွပ်စွဲပြောဆိုနေကြပါတယ်။