ကိုရိုနာဗိုင်းရပ်စ် ကူးစက်ခံရသူ ဗြိတိန်ဝန်ကြီးချုပ် ဆေးရုံကဆင်

ဗြိတိန်နိုင်ငံမှာ ကိုရိုနာဗိုင်းရပ်စ် ကူးစက်ခံလိုက်ရတဲ့ ဗြိတိန်ဝန်ကြီးချုပ် Boris Johnson ဟာ ဒီကနေ့မှာ ဆေးရုံကနေ ဆင်းလာပါပြီ။ ဝန်ကြီးချုပ် Boris Johnson ဟာ ကိုရိုနာဗိုင်းရပ်စ် ကူးစက်ခံခဲ့ရတဲ့အတွက် လန်ဒန်မြို့ ဆေးရုံတခုက အရေးပေါ်လူနာတွေကိုထားတဲ့ အထူးကြပ်မတ် ကုသဆောင်မှာ ကုသခဲ့ရတာ ဖြစ်ပါတယ်။ ဝန်ကြီးချုပ်အနေနဲ့ ဆေးရုံကနေ ပြန်ဆင်းလာပြီဖြစ်ပေမယ့် အလုပ်တော့ ချက်ချင်းပြန်လုပ်ဦးမှာမဟုတ်ဘဲ လန်ဒန်မြို့ပြင်မှာရှိတဲ့ ဝန်ကြီးချုပ်ရဲ့ Chequers House နေအိမ်မှာ ဆက်ပြီးတော့ အနားယူသွားမှာဖြစ်တယ်လို့ ဝန်ကြီးချုပ်ရုံးက ကြေညာချက် ထုတ်ပြန်လိုက်ပါတယ်။ ဝန်ကြီးချုပ် Johnson ဟာ ပြီးခဲ့တဲ့တပတ်က လန်ဒန်မြို့က St. Thomas ဆေးရုံကို တက်ခဲ့ရတာဖြစ်ပြီး ဒါဟာ ဗိုင်းရပ်စ်ကူးစက်ခံရတာကို သိရှိပြီး ၁၀ ရက်မြောက်နေ့မှာ တက်တာဖြစ်ပါတယ်။ ဆေးရုံမှာရှိတဲ့ NHS က ကျန်းမာရေးဌာန ဝန်ထမ်းတွေကို အလွန်ကျေးဇူးတင်ပြီး ဆေးရုံဝန်ထမ်းတွေက သူ့အသက်ကို ကယ်တင်ပေးခဲ့တာဖြစ်တယ်လို့ ဝန်ကြီးချုပ် Johnson က ဆေးရုံမှာ ဒီကနေ့ ပြောပါတယ်။ ဒါဟာ ဝန်ကြီးချုပ် Johnson ကို အထူးကြပ်မတ် ကုသဆောင်ကနေ ထုတ်ပြီးတဲ့နောက် လူထုကို ပထမဆုံး ပြောကြားတာဖြစ်ပါတယ်။ ဝန်ကြီးချုပ် Johnson အနားယူနေစဉ် အချိန်အတွင်းမှာတော့ နိုင်ငံခြားရေးဝန်ကြီး Dominic Raab က ဝန်ကြီးချုပ်ရဲ့ တာဝန်တွေကို ယူသွားမှာဖြစ်ပါတယ်။ လူမှုကွန်ရက်တွေမှာတော့ ဝန်ကြီးချုပ်ရဲ့ အမှတ် ၁၀ ဒေါင်းနင်းလမ်းနေအိမ်ကနေ ဗြိတိန်ပြည်သူတွေကို အီစတာပွဲတော် ဆုတောင်းစကားတွေ ပြောထားပြီး ဗြိတိန်နိုင်ငံတဝှမ်းမှာ အပြင်မထွက်ရအမိန့် ထုတ်ထားတာကြောင့် ဘုရားကျောင်းတွေ ပိတ်ထားတယ် ဆိုတာကိုလည်း အသိပေးထားပါတယ်။ တချိန်တည်းမှာပဲ ဗြိတိန်နိုင်ငံဟာ ဥရောပတိုက်မှာ ကိုရိုနာဗိုင်းရပ်စ် ကူးစက်ခံရမှု အဆိုးရွားဆုံးနိုင်ငံ ဖြစ်လာနိုင်တယ်ဆိုတဲ့ ခန့်မှန်းချက်တွေလည်း ထွက်ပေါ်လာနေပါတယ်။ ဗြိတိန်မှာ အခုသီတင်းပတ်ကုန်အတွင်း ကိုရိုနာဗိုင်းရပ်စ် ကူးစက်ခံရမှု ၉၈၀၀ ကျော်ရှိပြီး စနေနေ့က ၉၀၀ ကျော် သေဆုံးခဲ့တာကြောင့် အခုဆိုရင် ရောဂါကူးစက်ခံရသူ အရေအတွက်ဟာ ၇ သောင်း ၉ ထောင်ကျော်လာနေပြီး သေဆုံးသူ အရေအတွက် ၉ ထောင်ကျော်ရှိပါတယ်။

Credit