COVID-19 ကြောင့် မြန်မာနဲ့ ဒေသတွင်းစီးပွားရေး ထိခိုက်နိုင်ကြောင်း ကမ္ဘာ့ဘဏ်သတိပေး

ကိုရိုနာဗိုင်းရပ်စ် ကူးစက်မှုတွေကြောင့် မြန်မာနိုင်ငံအပါအဝင် ဒေသတွင်းမှာ စီးပွားရေး ကျဆင်းနိုင်ကြောင်း ကမ္ဘာ့ဘဏ်က သတိပေးလိုက်ပါတယ်။  COVID-19 ကပ်ရောဂါကြောင့် မြန်မာနိုင်ငံမှာ ၂၀၁၉-၂၀၂၀ ဘဏ္ဍာနှစ်အတွင်း စီးပွားရေး ထိခိုက်နိုင်ပေမဲ့ အစောပိုင်းမှာ စီးပွားရေးအခြေအနေ ကောင်းမွန်ခဲ့တဲ့အတွက် အနည်းငယ် ခံသာနိုင်ကြောင်းလည်း ကမ္ဘာ့ဘဏ်ရဲ့ ထုတ်ပြန်ချက်က ဖော်ပြပါတယ်။ ကျန်းမာရေးဆိုင်ရာ မူဝါဒတွေနဲ့ စီးပွားရေးဆိုင်ရာ မူဝါဒတွေကို အချိုးညီညီ သတ်မှတ်နိုင်မယ်ဆိုရင် စီးပွားရေး အခြေအနေကို ထိန်းထားနိုင်မှာ ဖြစ်ပေမဲ့ ပြည်တွင်းမှာ ဗိုင်းရပ်စ်ကူးစက်မှုတွေ ပိုဆိုးလာမယ်ဆိုရင်တော့ စီးပွားရေး အကျပ်အတည်းတွေ ကြုံရနိုင်ကြောင်းလည်း သတိပေးထားပါတယ်။  ကိုရိုနာဗိုင်းရပ်စ် ကူးစက်မှုကြောင့် မြန်မာနိုင်ငံမှာ ပထမဆုံး လူတဦးသေဆုံးကြောင်း မြန်မာတာဝန်ရှိသူတွေ အတည်ပြုလိုက်တဲ့ အချိန်မှာပဲ ကမ္ဘာ့ဘဏ်ရဲ့ သတိပေးချက် ထွက်ပေါ်လာတာပါ။  COVID-19 ကပ်ရောဂါကြောင့် မြန်မာနိုင်ငံနဲ့ ဒေသတွင်းမှာ စီးပွားရေး အင်အားကြီးဖြစ်တဲ့ တရုတ်နိုင်ငံတို့ အပါအဝင် အရှေ့အာရှပစိဖိတ်ဒေသတွင်း  နိုင်ငံတွေရဲ့ စီးပွားရေးဖွံ့ဖြိုးမှုတွေ ဒီနှစ်အတွင်း အကြီးအကျယ် ကျဆင်းသွားနိုင်ကြောင်းလည်း ကမ္ဘာ့ဘဏ်က သတိပေးထားပါတယ်။ ဒေသတွင်းက ဖွံ့ဖြိုးဆဲ နိုင်ငံတွေရဲ့ စီးပါွးရေး တိုးတက်မှုနှုန်းဟာ မနှစ်က ၅.၈ ရာခိုင်နှုန်း ရှိခဲပေမဲ့ ကိုရိုနာဗိုင်းရပ်စ် ကပ်ရောဂါပြန်ပြီး နာလန်ထူလာနိုင်တယ်ဆိုရင်တောင်မှ ဒီနှစ်အတွင်း စီးပါွးရေး တိုးတက်မှုနှုန်းက ၂.၁ ရာခိုင်နှုန်းသာ ရှိလိမ့်မယ်ဆိုပြီး ကမ္ဘာ့ဘဏ်ရဲ့ တနင်္လာနေ့ထုတ် အစီရင်ခံစာမှာ ခန့်မှန်းထားပါတယ်။

Credit